ठाण्यात सुरक्षित इंटरनेट दिवस साजरा | एक चुकीची क्लिक खातं रिकामं करू शकते — प्रशासनाचा इशारा.

डिजिटल युगात इंटरनेट आपल्या दैनंदिन जीवनाचा अविभाज्य भाग बनले आहे. बँकिंग व्यवहारांपासून शासकीय कामकाज, शिक्षण, मनोरंजन आणि सोशल मीडियापर्यंत सर्वच गोष्टी इंटरनेटवर अवलंबून आहेत. मात्र, तांत्रिक प्रगतीसोबत सुरक्षिततेचे भान ठेवणे ही काळाची गरज असल्याचा महत्त्वपूर्ण संदेश सुरक्षित इंटरनेट दिवसानिमित्त देण्यात आला. १० फेब्रुवारी रोजी जिल्हाधिकारी कार्यालयातील समिती सभागृहात सुरक्षित इंटरनेट दिवस उत्साहात साजरा करण्यात आला.

कार्यक्रमात निवासी उपजिल्हाधिकारी डॉ. संदीप माने यांनी इंटरनेट आणि कृत्रिम बुद्धिमत्ता (AI) यांचा वापर जबाबदारीने करणे अत्यावश्यक असल्याचे प्रतिपादन केले. इंटरनेटचा वापर आपण करतो की इंटरनेट आपल्याला वापरते, याचा प्रत्येकाने गांभीर्याने विचार करणे गरजेचे आहे, असे त्यांनी सांगितले. चुकीच्या आणि निष्काळजी वापरामुळे सायबर फसवणूक, आर्थिक नुकसान तसेच वैयक्तिक माहितीचा गैरवापर होऊ शकतो, असा इशाराही त्यांनी दिला.

यावर्षी “स्मार्ट टेक, सुरक्षित निवडी – एआयचा सुरक्षित आणि जबाबदार वापर” या थीम अंतर्गत सुरक्षित इंटरनेट दिवस साजरा करण्यात आला. आयआरएडी जिल्हा प्रकल्प व्यवस्थापक हिमानी शेंडे यांनी सादरीकरणाद्वारे सुरक्षित इंटरनेट वापराबाबत सविस्तर मार्गदर्शन केले. त्यांनी सायबर सुरक्षेचे महत्त्व पटवून देताना मजबूत पासवर्डचा वापर, टू-फॅक्टर ऑथेंटिकेशन सुरू ठेवणे, संशयास्पद लिंक आणि संदेश टाळणे तसेच मुलांच्या इंटरनेट वापरावर पालकांनी लक्ष ठेवण्याची गरज अधोरेखित केली.

सायबर फसवणुकीच्या घटनांमध्ये वाढ होत असल्याने नागरिकांनी अधिक सतर्क राहणे आवश्यक आहे. कोणतीही सायबर फसवणूक झाल्यास तात्काळ १९३० या हेल्पलाईन क्रमांकावर संपर्क साधावा तसेच cybercrime.gov.in या संकेतस्थळावर तक्रार नोंदवावी, अशी माहिती यावेळी देण्यात आली. वेळेवर तक्रार केल्यास आर्थिक नुकसान टाळण्यास मदत होऊ शकते.

कार्यक्रमास विविध विभागांचे अधिकारी आणि मान्यवर उपस्थित होते. जनजागृती आणि डिजिटल सुरक्षिततेचा संदेश देत कार्यक्रम यशस्वीपणे पार पडला.

डिजिटल जगात सुरक्षित राहणे ही प्रत्येक नागरिकाची जबाबदारी आहे. इंटरनेट आणि एआयचा योग्य, सजग आणि जबाबदार वापर केल्यासच सायबर गुन्ह्यांपासून संरक्षण मिळू शकते.

अशाच ताज्या आणि विश्वासार्ह बातम्यांसाठी Mahavruttant Channel ला Subscribe करा.